“𝙔𝙤𝙪 𝙖𝙧𝙚 𝙣𝙤𝙩 𝙟𝙪𝙨𝙩 𝙩𝙝𝙚 𝙗𝙚𝙨𝙩 𝙖𝙣𝙙 𝙩𝙝𝙚 𝙗𝙧𝙞𝙜𝙝𝙩𝙚𝙨𝙩, 𝙮𝙤𝙪 𝙖𝙧𝙚 𝙩𝙝𝙚 𝙝𝙤𝙥𝙚 𝙤𝙛 𝙚𝙫𝙚𝙧𝙮 𝙗𝙖𝙧𝙖𝙣𝙜𝙖𝙮 𝙞𝙣 𝙤𝙪𝙧 𝙥𝙧𝙤𝙫𝙞𝙣𝙘𝙚.” – Gov. Mendoza sa mga bagong iskolar ng probinsya

Amas, Kidapawan City | Oktubre 23, 2024 – Inilarawan ni Governor LALA TALIÑO-MENDOZA bilang pag-asa ng lalawigan ang mga kabataang mapalad na napili bilang benepisyaryo ng Provincial Scholarship Program ng pamahalaang panlalawigan kasabay ng pagbisita nito sa ginawang Memorandum of Agreement ( MOA ) Signing ngayong araw sa Provincial Gymnasium, Amas, Kidapawan City.

Binigyang diin ng butihing gobernadora ang kagustuhan nitong maipaabot ang dekalidad at pantay na oportunidad sa bawat mamamayan saan mang sulok ng lalawigan upang matulungan ang mga ito sa kanilang pamumuhay. Aniya, “𝙒𝙚 𝙬𝙖𝙣𝙩 𝙚𝙫𝙚𝙧𝙮 𝙤𝙥𝙥𝙤𝙧𝙩𝙪𝙣𝙞𝙩𝙮 𝙩𝙤 𝙗𝙚 𝙖𝙘𝙘𝙚𝙨𝙨𝙞𝙗𝙡𝙚 𝙩𝙤 𝙖𝙡𝙡 𝙚𝙨𝙥𝙚𝙘𝙞𝙖𝙡𝙡𝙮 𝙞𝙣 𝙛𝙖𝙧-𝙛𝙡𝙪𝙣𝙜 𝙗𝙖𝙧𝙖𝙣𝙜𝙖𝙮𝙨. 𝙏𝙝𝙖𝙩 𝙞𝙨 𝙚𝙦𝙪𝙖𝙡 𝙤𝙥𝙥𝙤𝙧𝙩𝙪𝙣𝙞𝙩𝙮 𝙩𝙤 𝙚𝙫𝙚𝙧𝙮 𝙤𝙣𝙚.”

Inilahad din ni Gov. Mendoza ang iba pang programang patuloy nitong pinagsisikapang maitaguyod para sa mga kabataang Cotabateño na isang patunay ng kanyang seryoso at sinserong pagmamalasakit tungo sa pagkamit ng maganda at maunlad na kinabukasan ng mga ito.

Nasa 630 na bago at kwalipikadong mag-aaral ng iba’t ibang pampubliko at pribadong paaralan sa probinsya ang natanggap sa scholarship program ng kapitolyo kung saan sumailalim din ang mga ito sa oryentasyon hinggil sa kanilang magiging responsibilidad at ang mga itinakdang alituntunin ng kapitolyo upang mapanatili ang naturang oportunidad ng programa.

Maliban sa MOA signing at orientation, nakuha na rin ng mga iskolar ang kanilang tig-P6,000 na allowance o kabuoang P3.78M na halaga ng pondong inilaan ng probinsya para sa unang semestre ng school year 2024-2025 na magagamit ng mga ito bilang pantustos sa kanilang pag-aaral.

Ang nasabing aktibidad ay pinangasiwaan ng Provincial Youth Development Office (PYDO) na pinamamahalaan ni Laarni Y. Blase bilang Division Chief. Dumalo rin si Boardmember Sittie Eljorie Antao-Ballisi kasama ang mga Provincial Advisory Council members na sina Dr. Gloria Mudanza, Vilma Gonzales, Sylvia Cabading at managing consultants na sina Alma Tuyan at Tessie Victoriano.//idcd-pgo-mombay/PhotobyWMSamillano, CSMombay, TBandali//