𝗚𝗼𝘃 𝗠𝗲𝗻𝗱𝗼𝘇𝗮 𝘀𝗮 𝗺𝗴𝗮 𝗦𝗲𝗻𝗶𝗼𝗿 𝗖𝗶𝘁𝗶𝘇𝗲𝗻𝘀: “𝙋𝙖𝙡𝙖𝙣𝙜𝙜𝙖 𝙠𝙤 𝙠𝙖𝙢𝙤”

Amas, Kidapawan City Bilang pakikiisa ng pamahalaang panlalawigan sa pagdiriwang ng “2023 Elderly Filipino Week” o “Linggo ng Katandaang Pilipino” sa buong bansa, inorganisa ngayong Biyernes ng Provincial Social Welfare and Development Office o PSWDO ang “Culmination Day Program” sa Provincial Gym, Amas, Kidapawan City.

Naging matagumpay ang nasabing pagtitipon kung saan itinampok ang bonggang “Literary-Musical Contest” na pinagbidahan ng mga kahanga-hangang miyembro ng Senior Citizens’ organizations na nagmula sa labing-pitong (17) mga bayan, kasama na ang nag-iisang lungsod ng Kidapawan sa probinsya.

Puno ng saya at sigla ang mga lola sa pag-indak at paggiling ng mga ito sa “zumba contest” gamit ang mga modernong kasuotan sa tugtuging “One Way Ticket” na binansagang “timeless classic” na pinasikat ni Neil Sedaka noong 1959.

Naiparada din ng mga nakatatanda ang kanilang nagagandahang “traditional filipino outfit” sa isinagawang “Cariñosa folk dance contest”, maging sa “choral contest” kung saan kanilang kinanta ang mga awiting tatak “Original Filipino Music” o OPM.

Ngunit higit na naging espesyal ang naturang pagtitipon sa pagdalo ng ina ng lalawigan na si Governor Emmylou “Lala” J. Taliño-Mendoza na buong pagmamahal na sinambit sa mga Senior Citizens ang mga katagang: “𝙋𝙖𝙡𝙖𝙣𝙜𝙜𝙖 𝙠𝙤 𝙠𝙖𝙢𝙤.”

Ipinaliwanag din ng butihing gobernadora na ang patuloy na implementasyon ng “Social Pension Program” ni Pangulong Ferdinand “Bongbong” R. Marcos, Jr. sa mga kwalipikadong nakatatanda ay daan upang sila ay kilalanin bilang matibay na pundasyon ng lipunan at lubos na mapasalamatan sa lahat ng kanilang kontribusyon na nagdulot ng katagumpayan sa bawat pamilya, komunidad at ng buong bansa.

Kaugnay nito, ibinahagi rin ni Gov. Mendoza ang ilang mga programang ipinapatupad ng kanyang administrasyon sa ilalim ng adbokasiyang “Serbisyong Totoo” na nagpapakita ng tapat na pagkalinga sa mga senior citizens.

Kabilang dito ang pamamahagi ng assistive devices tulad ng wheelchairs, canes, crutches at walkers sa mga nangangailangan, pagsasagawa ng “Medical-Dental Outreach Program,” at distribusyon ng libreng “maintenance medicines” sa mga dumaranas ng sakit na altapresyon at diabetes.

Sa kabilang banda, dahil sa nalalapit na “barangay election” sa ika-30 ng Oktubre 2023, hinikayat din ni Gov. Mendoza ang mga senior citizens na makiisa sa halalan, pumili at suportahan ang mga kandidato na seryosong haharapin ang mga problema sa kabarangayan at handang pagsilbihan ang mga mamamayan.

Samantala, dumalo rin sina Boardmembers Ivy Martia Lei C. Dalumpines-Ballitoc at Joemar S. Cerebos sa naturang selebrasyon na nagpaabot ng kanilang pagbati at pasasalamat sa mga nakatatanda sa pananatiling inspirasyon ng mga ito hindi lamang sa mga kabataan kundi sa buong sambayanan.

Nasa pagtitipon din sina Federation of Senior Citizens’ Association of the Philippines (FSCAP) Provincial Federation President Leonardo P. Songcaya, kasama si PSWDO Head Arleen A. Timson.//idcd-pgo-frigillana/photoby:LADelaCruz